Kvifor eg kjøpte Nintendo Switch 2 som vaksen

Eg har ikkje hatt ei Nintendo-konsoll sidan eg var liten. Den siste var ein Game Boy Advance SP, den ikoniske samanklepp-modellen som var det kulaste i verda. Eg spelte Pokemon Ruby til eg kjende Hoenn-regionen betre enn heimstaden min, og la fleire hundre timar inn i Pokemon Fire Red.

Eg hugsar også alle timane heime hos naboen, der vi spelte Nintendo Wii til vi var sveitte. Wii Bowling var sjølvsagt legendarisk, men Mario & Sonic at the Olympic Games var det verkelege høgdepunktet. Det var ekte konkurranseinstinkt i den stova.

Så gjekk det 20 år. Eg vart vaksen, fekk jobb, flytta for meg sjølv, og speling vart noko som skjedde "viss eg hadde tid". Spoiler: eg hadde aldri tid. Og den tida eg hadde, gjekk til online-spel som Call of Duty. Det var alltid online, alltid multiplayer, alltid det same.

Det er fyrst no i seinare tid eg har innsett kor mykje eg gjekk glipp av ved å ikkje spele singleplayer-spel med fantastiske historier. Det er som å sjå ein film der du sjølv gjer valga. Kva er det å ikkje like med det?

Så kom Nintendo Switch 2.

Det som til slutt fekk meg til å kjøpe den

Eigentleg har eg vurdert å skaffe meg ein Nintendo-konsoll heilt sidan den fyrste Switch-en kom. Men eg gjekk aldri for det. Jo lenger eg venta, jo sterkare vart ryktene om ein Switch 2, og til slutt tenkte eg at eg like godt kunne vente litt til.

Så skjedde to ting samstundes. For det fyrste byrja The Legend of Zelda: Breath of the Wild og Tears of the Kingdom å dukke opp overalt i YouTube-feeden min. Begge har vunne Game of the Year, og folk kalla dei dei beste spela nokon gong. Eg klarte ikkje unngå det lenger.

Og så, som prikken over i-en: Pokemon Fire Red og Leaf Green kom til Switch som eigne kjøp på eShop i februar 2026, som ein del av Pokemon sitt 30-årsjubileum. 20 dollar per stk, og alle dei originale funksjonane fungerer, inkludert lokal trading og battling. Tanken på å spele Fire Red igjen, men no på ein stor skjerm eller i senga, var det som faktisk fekk meg til å trykke "kjøp".

Og så kom leaksane. Dataminer @meatball_132 fann referansar til Pokemon Ruby, Sapphire og Emerald inne i koden til emulatoren som køyrer Fire Red og Leaf Green. Emulatoren (som heiter Sloop) støttar tilsynelatande ROM-ane for alle tre. Ingenting er offisielt bekrefta enno, men viss dei kjem, er sirkelen komplett. Då er det 2004 igjen, berre med betre skjerm og verre rygg.

Kvifor Switch 2 er perfekt for travle vaksne

Her er greia: eg har ikkje tid til å setje meg ned framfor ein TV i fleire timar. Det er det som er genialt med Switch 2. Den er hybrid. Du kan spele på TV-en når du har tid, og ta den med deg når du ikkje har det.

Eg spelar:

I senga før eg sovnar (15-30 minutt med ein god roguelike eller eit Zelda-dungeon)
På bussen/toget til og frå jobb
I sofaen medan sambuaren ser på noko ho vil sjå. Å vere saman, men gjere kvar sine ting, er undervurdert
På TV-en når eg faktisk har ein heil kveld for meg sjølv

Det er speling som tilpassar seg livet ditt, ikkje omvendt.

Den beste "saman"-maskina

Men det beste med Switch-en er kanskje ikkje eingong solo-spelinga. Det er det som skjer når du dreg fram ekstra kontrollarar.

Mario Kart World med ein gjeng venner ein laurdagskveld? Det er ikkje berre eit spel, det er ein sosial oppleving. Heiarop, forbannelsar, alliansar som blir brotne i siste sving. Switch 2 har CameraPlay, som let deg sjå ansiktsreaksjonane til motstandarane medan de spelar. Det gjer Mario Kart-kveldane endå meir kaotiske.

Super Mario Party Jamboree er det same: kaos, latter, og minst éin person som ikkje snakkar med deg etterpå (midlertidig). Mario Tennis Fever er overraskande bra for to spelarar.

Nintendo har alltid forstått noko dei andre konsollprodusentane ikkje heilt har klart: at speling er best når du deler det med nokon. Switch 2 gjer det enklare enn nokon gong. Joy-Con-kontrollarane kan delast i to, så du treng ikkje eingong kjøpe ekstra utstyr for å spele saman.

Og GameShare er genialt: du kan invitere venner til å spele eit spel lokalt eller online, sjølv om dei ikkje eig det sjølv. Perfekt for dei gongane du vil prøve noko nytt saman utan at alle må kjøpe det fyrst.

Switch 2 har også GameChat med ein eigen C-knapp på kontrollaren. Du kan chatte, dele skjerm, og til og med bruke webkamera medan du spelar. Ein fantastisk funksjon. Einaste problemet? Vennelista mi har nøyaktig 0 personar på seg førebels. Hovudmålet mitt med denne artikkelen er ærleg talt å overtyde venner og familie om å skaffe seg ein Switch 2, så eg har nokon å spele med. Er det gjennomsiktig? Ja. Fungerer det? Vi får sjå.

For meg har Switch-en blitt den tingen som får folk til å leggje frå seg telefonane og faktisk gjere noko saman. Det er ganske fint.

Spelane eg endeleg får prøvd

Det er noko magisk med å ha eit 20 år langt etterslep av legendary spel å ta igjen. Her er lista mi:

The Legend of Zelda: Breath of the Wild & Tears of the Kingdom

Desse to er visstnok blant dei beste spela som nokon gong er laga. Eg har bevisst unngått spoilers i årevis. No kan eg endeleg oppleve dei sjølv. Begge kjem i forbetra versjonar på Switch 2, så timinga kunne ikkje vore betre.

Mario Kart World

Følgde med Switch 2 i bundle-pakka. Det er Mario Kart. Like moro som det alltid har vore, berre no med online multiplayer og grafikk som ser ut som ein Pixar-film.

Metroid Prime 4

Eg har aldri spelt eit Metroid-spel. Visstnok er det ein skandale. Metroid Prime 4 skal vere ein god stad å starte.

Pokémon Legends: Z-A

Pokemon i ein open verden sett i Kalos-regionen. Som ein som vaks opp med dei fyrste generasjonane, er det fascinerande å sjå kor langt serien har kome.

Pokémon Winds og Pokémon Waves

Annonsert på Pokemon sitt 30-årsjubileum 27. februar 2026, og det ser heilt utruleg ut. Generasjon 10, sett i ein tropisk øyrikeregion med undervatnsområde du kan utforske. Nye startarar (Browt, Pombon og Gecqua) som allereie ser ikoniske ut. Kjem i 2027, og det er nok spelet eg gler meg mest til framover.

Retro-spel via Nintendo Switch Online

Og så er det jo dette. Med eit Nintendo Switch Online + Expansion Pack-abonnement får du tilgang til spel frå NES, SNES, Game Boy, Game Boy Advance, N64, og GameCube. Det er bokstaveleg talt hundrevis av klassiske spel.

Pokemon Fire Red og Leaf Green er separate kjøp på eShop (ikkje ein del av NSO), men resten av GBA-biblioteket på NSO er fullt av gull. Å spele desse klassiske spela på ein moderne skjerm med save states? Ren nostalgi.

Er det verdt prisen?

Switch 2 er ikkje billeg. Men viss du tenkjer på det som underhaldning per time, er det ein av dei billegaste hobbiane du kan ha. Eit einaste stort spel som Zelda gir deg 100+ timar med underhaldning. Samanlikna med strøymetenester, kinobesøk, eller andre hobbyar er det faktisk ganske rimeleg.

Og viss du har ein haug med spel du aldri har spelt, slik som meg, har du underhaldning for årevis framover.

Tips for nybyrjarar

Viss du vurderer å kjøpe ein Switch 2, her er nokre tips:

Start med éit spel i tillegg til Mario Kart. Ikkje kjøp fem spel på ein gong, du kjem aldri gjennom dei
Få Nintendo Switch Online med Expansion Pack for retro-spelbiblioteket. Det er verdt det
Kjøp ein ekstra kontroller viss du vil spele med nokon. Joy-Con-ane fungerer, men ein Pro Controller er mykje meir komfortabel
Sett på ein skjermbeskyttar med ein gong. Skjermen er fin, ta vare på den
Ikkje undervurder indie-spel. Nokre av dei beste Switch-spela er små, billige indie-titlar

Treng du hjelp med å setje opp ein ny Switch 2, kople den til TV-en, eller få WiFi og online til å fungere? Det er akkurat den typen ting eg hjelper folk med. Book ein time, så ordnar vi det.